मारिएका थप दुईजनाबारे अझै अलमल
काठमाडौंः अफगानिस्तानको राजधानी काबुलमा सोमबार बिहान आत्मघाती बम आक्रमणमा मारिएका १२ जना नेपाली युवाको नाम परराष्ट्र मन्त्रालयले सार्वजनिक गरेको छ ।
परराष्ट्र मन्त्रालयका प्रवक्ता भरतराज पौड्यालले पत्रकार सम्मेलन गरेर काबुलमा मारिएका १२ नेपालीको नाम आएको पत्रकारहरुलाई बताएका हुन् ।
प्रवक्ता पौड्यालका अनुसार काबुलमा मारिएकामध्ये १२ जनाको मात्र पुष्टि भएको बताए । ‘१४ जना मारिएको सूचना आएपनि अन्य दुईजना विदेशी हुनसक्ने अनुमान छ’, उनले भने, ‘नेपालीसँग अनुहार मिल्दोजुल्दो भएपनि उनीहरु नेपाली नै भएको एकीन भएको छैन ।’
काबुल विस्फोटमा १४ जना मारिएको कुरा सरकारले जानकारी दिएको थियो । परराष्ट्र मन्त्री कमल थापाले पनि सोमबारको संसद् बैठकमा १४ नेपालीको ज्यान गएको जानकारी गराएका थिए ।
प्रवक्ता पौड्यालले काबुल जानका लागि पाकिस्तानस्थित कार्यवाहक राजदूत तीर्थराज अर्याल तयारी अवस्थामा रहेको जानकारी दिए । इस्लामावादबाट काबुल जाने जहाज बिहानै उड्ने भएकाले भोलि बिहानसम्म पाकिस्तानी दूतावासबाट अधिकारीहरु काबुल पुग्ने पौड्यालको भनाइ छ ।
‘पाकिस्तानस्थित हाम्रा अधिकारीहरु काबुल पुगेर शवलाई नेपाल फर्काउन तथा घाइतेको प्रभावकारी उपचारको पहल गर्नेछन्’, पौड्यालले भने, ‘घटनापछि सरकारले अफगान सरकारसँग निरन्तर सम्पर्क गरिरहेको छ । घाइतेको उपचारमा कुनै कसर नराख्न भनेका छौं ।’ annapurna बाट
 |
